يا عسكرى يابو بندقية

يا عسكرى يابو بندقية

نحلم بيوم يجينا الخير

بلادنا مش حاسة بتغيير

ما دام حصانتك محمية.

يا عسكري يا بو بندقية

يا عسكري شعبك راسي

دي المسألة (أمن سياسي)

تحمي الملك واحنا نقاسي

م البلطجة والحرامية.

يا عسكري يا بو بندقية

يا عسكري أمرك دا عجيب

وليك سياستك ف التهليب

وغلبنا واحنا نقولك عيب

واخدنا قال لقمة هنية

يا عسكري يا بو بندقية

يا عسكري ووشنا للحيط

أصلك قطعت خميرة البيت

ما عادش لينا دقيق ولا زيت

والفول غلى والطعمية

يا عسكري يا بو بندقية

يا عسكري بقولك حاجة

مش كارثة ؟ نملا التلاجة

سموم وسرطان متمكن

في منتجاتنا الزراعية؟

يا عسكري يا بو بندقية

يا عسكري ليك إما حاجات!

لما انضربنا ف الانتخابات

عمال تميس ع الخواجات

وراثة هيا وملكية؟

يا عسكري يا بو بندقية

يا عسكري بصيت قدام؟

لما أنت بعت قطاعنا العام؟

لا سبت باب رزق الأجيال

وخلاص كالونا الأغنيا

يا عسكري يا بو بندقية

يا عسكري وغرقت عبارة

وقلنا يا ولاد مصر خسارة

تصاريح فشنك وتلفزيون

والناس ضحايا ومنسية

يا عسكري يا بو بندقية

يا عسكري وريحتك فاحت

نازل أكيد علشان فاحت

فرحتنا والله كمان راحت

بإيدين عصابة ( وطنية)

يا عسكري يابو بندقية

وشبابنا آه ويا عيني عليه

أخد الشهادة ودا اللي عليه

مفيش جواز ولا شقة يا بيه

ولا مهر ولا عيشة هنية

يا عسكري يابو بندقية

يا عسكري ومفيش توظيف

وكتير وعدنا الدوك (نظيف)

على إيه بلاش والنبي تكليف

حنروح بلادنا العربية

يا عسكري يابو بندقية

يا عسكري والله دي ورطة

مفيش معاملة إلا بواسطة

وناس بتوع حطة يا بطة

رشاوي , قال إيه دي هدية

يا عسكري يابو بندقية

يا عسكري ومنعت الناس

تقول أعوذ برب الناس

وفساد يعم الساس والراس

وف انتظار نكبة قوية

يا عسكري يابو بندقية

يا عسكري وسرك باتع

فى لم الكوارث متتابع

في البحر والغيط والشارع

دا الرك أصلا على النية

يا عسكري يابو بندقية

والعسكري يقول كله تمام

والحالة ماشية أهي لقدام

يا مسلمين دا الكدب حرام

بالعكس ماشية العربية

يا عسكري يابو بندقية

يا عسكري وليه كده مغرور

لما أنت كنت فقير مستور

ليه جي ع الشعب المقهور

بايدين حديد مستقوية؟

يا عسكري يا بو بندقية

يا عسكري شعبك ده عظيم

يكفيه كمان حبة ملاليم لكن حرام كتر التلطيم

ما بين مجالس قومية

يا عسكري يابو بندقية

يا عسكري وذنبك على جنبك

تقفل بيبانك عن شعبك؟

لو كنت وريتهم عدلك

لكانوا ليك سنده قوية

يا عسكري وزهقنا خلاص

والعجل أهو دخل البلاص

لا هدمة ولا لقمة ولا مداس

حتى الحمام مات في الغية

يا عسكري يا بو بندقية